来源时间为：2023-05-09
原创沈嘉禄海上梦叠
来源：夜光杯
作者：沈嘉禄
改写、讲述：知足常乐
审核、推荐：丁迪蒙
编辑：王乙其
消息传来，上海轨交将要接通苏州。上海人心心念念要去个动力，是来自苏州个一碗面。宽汤劲道，头势清爽，浇头么，花头经老透个：焖肉、焖蹄、冻鸡、爆鳝、爆鱼、卤鸭、秃黄油、狮子头、罗汉上素，枫镇个大面只勒勒大热天再应市个。金榜题名个是三虾——最好是小镬子现炒，有人讲究半汤。提起姑苏一碗面，上海男人常庄要争得面红耳赤，面还没吃着，馋唾水已经嗒嗒渧了呀。
苏州有忒多个美食勒勒等阿拉，假使初夏轨道交通好通车了，就可以搭“三白”来一场约会。
“三白”全称是“太湖三白”——白鱼、银鱼、白虾。勒我有限个美食经验里向，首先见识个是白虾。伊个辰光还住勒弄堂里，穿堂风夹勒花香，有小贩挑担子进来，箩筐底下头还勒滴水唻。勒水井个边头，伊拿担子卸脱，东张张西望望：“白米虾，要伐！”“白米虾，要伐！”声音卡勒胡咙口，勿敢忒张扬。刚好勒淘米个大姆妈耳朵尖，拿起小淘箩就冲出灶披间：“来，称一斤。”
清代《太湖备考》里讲：“太湖白虾甲天下，熟时色仍洁白。”
白虾，上海人一律叫作“白米虾”，莹莹白玉顶勒一点红，有辰光看到屈身抱子，勿免就咕一声“罪过”。伊个辰光，白米虾勒小菜场里勿大看得见个，小鲜进弄堂赛过是仙女下凡，“普大喜奔”就变成功规定个情节了。白米虾炒韭菜，色彩清雅，过过老酒邪气赞个，碗底个汤汁拿来淘饭也是鲜得勿得了个；白米虾烧豆腐，勾薄芡，浇猪油，撒葱花，是下饭榔头。吃了白米虾，对苏州念念不忘，呒没想到，小贩从苏州乘长途汽车到上海来，一路浪有得几化辛苦。
大约摸要到上世纪九十年代末，上海个小菜场里再看得见白米虾，也有活个个。勒基围虾搭仔斑节虾个夹击之下，伊出彩个空间已经勿大了。饭店里个白米虾以白灼居多，乌目、红顶、长须，主人捏牢仔一撮虾须移到客人个菜碟里，或者叫“提拔”，或者称“谦虚”，是文人雅士个小噱头。
勒苏州个酒楼饭店，白虾仍旧是大众情人，白灼之外，还好剥肉滑炒加甜豆。有趟勒吴江宾馆个江南运河宴浪赏味，吃到了纤柔香糯个白虾干，还有玫瑰香醉炝熟白虾，一干一湿，江南个情调。
银鱼，上海人也叫伊“面杖鱼”，浑身透明、晶莹白皙，勒唐代俗称“白小”。杜甫有首诗《白小》：
白小群分命，天然二寸鱼。细微沾水族，风俗当园蔬。入肆银花乱，倾箱雪片虚。生成犹拾卵，尽取义何如。
白白个，小小个，轻盈如雪花。宋代文人比较务实，留下了“春后银鱼霜下鲈”个诗句，拿银鱼搭仔鲈鱼并列为河鲜珍品。勒清代杨光辅个《淞南乐府》里，则有了歌谣个调性：
淞南好，斗酒饯春残。玉箸鱼鲜和韭煮，金花菜好入粞摊，蚕豆又登盘。
韭菜炒银鱼，伊个勿是写勒农家乐个小黑板浪向个么？湖畔个百姓还拿银鱼称作冰鱼、玻璃鱼、绣花针等等。
作者：沈嘉禄
讲述：知足常乐
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
原标题：《相约姑苏品“三白”（上）》
特别声明本文为澎湃号作者或机构在澎湃新闻上传并发布，仅代表该作者或机构观点，不代表澎湃新闻的观点或立场，澎湃新闻仅提供信息发布平台。申请澎湃号请用电脑访问http://renzheng.thepaper。cn。
